पुणे : एकाच चित्रप्रदर्शनात तब्बल १५ चित्रकारांची कला अनुभवण्याची संधी पुणेकरांना मिळणार आहे. निमित्त आहे चित्रकार निलेश पवार यांच्या कलाश्री आर्ट्स या संस्थेतर्फे आयोजित करण्यात आलेल्या ‘ब्रश स्ट्रोक्स’ या चित्रप्रदर्शनाचे. येत्या गुरुवारी, ११ एप्रिल ते रविवार, १४ एप्रिल २०१९ दरम्यान सेनापती बापट रस्त्यावरील पत्रकारनगर येथील दर्पण आर्ट गॅलरी येथे या प्रदर्शनाचे आयोजन करण्यात आले आहे.
हे प्रदर्शन सर्वांसाठी विनामूल्य खुले आहे. गुरुवारी सायंकाळी सात वाजता सहभागी चित्रकारांच्या हस्ते या प्रदर्शनाचे उद्घाटन होणार आहे. त्यानंतर १२ ते १४ एप्रिल २०१९ दरम्यान सकाळी ११ ते सायं सात या वेळेत रसिकांना ही चित्रे बघता येणार आहेत.
प्रत्येक कलाकार हा स्वत:च्या कल्पनाविस्ताराच्या जोरावर व्यक्त होण्याचा प्रयत्न करीत असतो आणि या व्यक्त होण्याला गरज असते ती आवडीची. हीच आवड जोपासत विविध १५ चित्रकार एकत्र येत ‘ब्रश स्ट्रोक्स’ या चित्र प्रदर्शनाच्या माध्यमातून आपली कला सादर करणार आहेत.
यामध्ये आरती किर्लोस्कर, करुणा चावला, मंजुश्री भणगे, नेहा जंगले, नीता बक्षी, नितीन भणगे, राजश्री जंगले, शैला मोरे, शुभांगी मांजरेकर, शुभदा रणदिवे, सुहास जंगले, सुनीता कोलते, सुनीता पाटील, सौरभ जंगले आणि निलेश पवार यांची चित्रे पाहण्याची संधी या प्रदर्शनाच्या माध्यमातून रसिक पुणेकरांना मिळणार आहे. या पंधरा चित्रकारांनी विविध विषयांवर काढलेल्या चित्रांचा या प्रदर्शनामध्ये समावेश करण्यात आला आहे.
कार्यक्रमाविषयी : ‘ब्रश स्ट्रोक्स’ चित्र प्रदर्शन
स्थळ : दर्पण आर्ट गॅलरी, पत्रकारनगर, सेनापती बापट मार्ग.
दिवस व वेळ : शुक्रवार,१२ एप्रिल ते रविवार, १४ एप्रिल, सकाळी ११ ते सायंकाळी सात वाजेपर्यंत.